واش ءِ گونیچ دمگ ءِ سرا امنیتی باسک اُرش ءُ تیرگواری ءَ 12 بلوچے جنیں آدم کُشگ ءُ ٹپیگ بوتگ

رَسانک نیوز/ سئےشمبے روچ 10 تیر ماہ 1404 ءَ، امنیتی باسک ءُ سپاہ ئے چیریں ادارے ٹولی ءَ واش ءِ کارواندر ءَ گونیچ دمگ ءِ سرا گوں مزنیں پلٹنے ءَ اُرش کرتگ۔ اے اُرش سُہب ءِ 5 ءَ بنگیج بوتگ ءُ داں ساھت 10 ءَ داشتگ، امنیتی باسک ءَ گوشتگ: ما پہ سرکارے ھلاپ سلاہ بندیں ٹولئے دزگیر کنگ ءَ اے دمگ ءِ سرا اُرش کرتگ. بلے دمگ ءِ جھمنندان ءَ، امنیتی باسک ءِ نیمون ءُ الزاماں دروگ لیک اَتگ ءُ یکسر رد کرتگ۔ جھمنندان ءَ گوشتگ: اُرش ءِ وھد ءَ دمگ ءَ ھچ سلاہ بندیں مردمے نہ بوتگ.

اے اُرش ءَ، چیریں ادارہ ءُ امنیتی باسک ءَ بے پیسریں جار ءُ توار ءَ لوگ ءُ جنیں آدمانے سرا تیرگواری کرتگ۔ اے تیرگواری ءَ یک جنیں آدمے کُشگ بوتگ ءُ یازدہ دگر ٹپیگ بوتگ. دمگ ءَ ترس ءُ دھشت ءِ سما اِنت.

کُشگ بوتگیں جنیں آدمے پجّار «ھان‌بی‌بی بامری»، 40 سالگ، گوشگ بوتگ، یازدہ ٹپیگ بوتگیں جنیں آدمانے پجّار «مدینہ بامری»، 24 سالگ، «سبا بامری»، 17 سالگ، «اسرا بامری»، 18 سالگ، «رھم‌بی‌بی بامری»، 32 سالگ، «سنج‌ ملک بامری»، 45 سالگ، «اسل بامری»، 20 سالگ، «مھدسہ بامری»، 16 سالگ، «مھتاپ بامری»، 50 سالگ، «پاتما بامری»، 26 سالگ، «لالی بامری»، 40 سالگ ءُ «ریھانہ بامری»، 21 سالگ زانگ بوتگ، آیانی میان ءَ دو ٹپیگ بوتگیں جنیں آدمانی ھالت ھراب گوشگ بوتگ.

گوشنت: ھان‌بی‌بی بامری ءَ گُٹّگ ءَ تیر وارتگ ءُ ساہ داتگ، لالی بامری ءُ اسرا بامری ءَ بدنے اہمیں بہر ءَ تیر وارتگ ءُ اے وھدا واش ءِ ھُمینی نادراہجاہ ءِ آی سی یو واڈ ءَ تھت ءِ باھوٹ اَنت، بید چہ ایشاں، ریھانہ بامری لاپ پُریگے بوتگ، چہ امنیتی باسک ءِ لٹ ءُ شاپ کنگ ءُ چرّہ ای تیر ءِ ورگ ءَ چُکّے کپتگ. ھال سرکنوکان ءَ امنیتی باسک ءِ اے زلم ءُ جنایت منّتگ ءُ گوشتگ اے زلم ءُ زوراں سرئے وھد ءَ ھچ مردیں چُکّے دمگ ءَ نہ بوتگ.

بلوچستان ءَ امنیتی باسکانے، جھمنندان ءُ ھاس کار چکّان ءُ جنیں آدمانے سرا پہ دیمیں تیرگواری کنگ نوکیں گپّے نہ اِنت، بلکے سرکارے بلوچان ءَ، پادلپاش کنگ ءِ سیاست ءَ درا کنت ءُ پیش دار اِیت، پیش دار اِیت کہ پہ امنیتی زمہ داران ءَ بلوچے جان ءُ مال ءَ اردشتی نیست اِنت.

رپوٹانے پٹ ءُ پول ءَ سرجمی ءَ پیش داشتگ کہ سال 2024 ءَ، پلیس ءُ امنیتی باسکانے کاروائی تہا 208 بلوچ کُشگ ءُ ٹپیگ بوتگ۔ اے میان ءَ 115 بلوچ ءَ ساہ داتگ ءُ 93 دگہ ٹپیگ بوتگ، کُشگ بوتگیں بلوچانے میان ءَ 13 چُک ءُ 4 جنیں آدم ھور اِنت ءُ ٹپیگ بوتگیں بلوچانے میان ءَ 20 چُک ءُ 12 جنیں آدم ھور اِنت.