ریگان ءَ، امنیتی باسک ءِ پدا کپگ ءُ تیرگواری ءَ، ٹیلکشئیں بلوچےگاڑی ءَ لیٹ وارتگ ءُ دو بلوچ سکّ ٹپیگ بوتگ اَنت

رَسانک نیوز/ دوشمبے 2 تیر ماہ 1404 ءِ بانگواہ ءَ، ریگان ءِ نزّیک ءَ امنیتی باسک ءِ ٹولی ءَ ٹیلکشئے بلوچے گاڑئے پدا کپتگ ءُ آیانی سرا تیرگواری کرتگ ھمیں وھد ءَ ٹیلکشئے بلوچے گاڑی ءَ لیٹ وارتگ ءُ گاڑئے دوئیں نندوک سک ّ ءَ ٹپیگ بوتگ اَنت.

رَسانک ءَ ٹپیگ بوتگیں ٹیلکشئیں بلوچانی پجّار «اھمد ایراندوست»، 20 سالگ ءُ تاج‌بکش ءِ چُک۔ «داوود ایراندوست»، 22 سالگ، دادمھمد ءِ چُک، دوئیں ٹیلکش سرباز ءَ مینان دمگ ءِ نندوک زانتگ.

رَسانک ءِ ھال سرکنوکان ءَ گوشتگ: امنیتی باسک ءَ شپ ءِ ساھت یک ءَ ریگان ءِ نزّیک ءَ، اے ٹیلکشانی گاڑئے پدا کپتگ ءُ آیانی سرا تیرگواری کرتگ، ایش پد آیانی گاڑی ءَ لیٹ وارتگ ءُ دوئیں ٹیلکش سکّ ءَ ٹپیگ بوتگ اَنت. اے ویل ءَ ٹپیگ بوتگیں دوئیں ٹیلکشئیں بلوچ، پنچ روچ نادراہجاہ ءَ تھت ءِ باھوٹ بوتگ اَنت. 6 تیر ماہ 1404 ءَ آیاں چہ نادراہجاہ ءَ گیشتگ ءُ رھادگ بوتگ اَنت.

رپوٹانے سرجمی ءَ سال 2024 ءَ، ٹوٹل 479 بلوچیں ٹیلکش، روڈ ءُ راھانی ویل ءَ، امنیتی باسکانی تیرگواری ءَ، سلاہ بندیں مردمانی اُرش ءَ، تراک ءُ آس ءِ در گِرَگ ءَ، آپ ءَ ڈوبگ ءَ کُشگ ءُ ٹپیگ بوتگ اَنت. اے میان ءَ 253 ٹیلکش ءَ ساہ داتگ ءُ 226 ٹیلکش ٹپیگ بوتگ.