رَسانک نیوز/ پنچشمبے 29 ھُرداد ماه 1404 ءَ، بلوچیں ورنائی کہ 27 ھُرداد ماه ءَ، دُزاپ ءِ جام جم 10 ءِ روڈ ءَ وتی لوگ ءِ دپ ءَ، مات ءِ چمّانی دیم ءَ سلاہ بندیں مردمان ءَ آئی ءِ سرا تیرگواری کرتگ، دو روچ ءَ پد، ماں دُزاپ ءِ ھاتم نادراهجاه ءَ ساہ داتگ ءُ بیراں بوتگ.
رَسانک ءَ اے بلوچیں ورنائے پجّار «مستفی رکشانی» 29 سالگ، ابدلرھیم ءِ چُک ءُ دُزاپ ءِ نندوک زانتگ.
رَسانک ءِ ھال سرکنوکان ءَ گوشتگ: سلاہ بندیں مردمان ءَ، مستفی ءِ لوگ ءِ دیم ءَ آئی ءِ سرا تیرگواری کرتگ۔ دمگ ءِ نندوکیں مردمان ءَ پہ درمان ءَ آئی ءَ دُزاپ ءِ نادراهجاه ءَ سر کرتگ، دو روچ ءَ پد، مستفی ءَ نادراهجاه ءِ آیی سی یو واڈ ءَ ساہ داتگ.
ھال سرکنوکان ءَ گوشتگ: سلاہ بندیں مردماں، مستفی ءِ جنگ ءَ پد، چہ جاه ءَ در شُتگ اَنت، آئی ءِ سیاد ءُ نزّیکیں مردمان ءَ چہ کماش ءُ اسپیت ریشان ءَ لوٹ اِتگ، کہ پیسر چہ ایشی ءَ کہ اَڑ ءُ جیڑہ گیشتر بہ بیت، جنوکان ءَ آیانی، یا کہ امنیتی باسک ءِ دست ءَ بہ دے اَنت.
رپوٹانے رِد ءَ، ماں سال ءِ 2024 ءَ، 469 بلوچے سرا سلاہ بندیں مردمان ءَ اُرش کرتگ، آیانی میان ءَ 284 بلوچ کُشگ ءُ 185 دِگہ ٹپیگ بوتگ اَنت. اے میان ءَ 47 چُک ءُ جنین آدم ھور اِنت، آیانی میان ءَ 17 چُک کُشگ ءُ 14 دِگہ ٹپیگ بوتگ اَنت، 9 جنین آدم کُشگ ءُ 7 دگہ ٹپیگ بوتگ.
Be the first to comment