رَسانک نیوز/ یکشمبے روچ 25 ھُرداد ماه 1404 ءَ، دُزاپ ءَ چار روچ دیمترا آوار جنگ بوتگیں «ادریس ھسنزھی» کماش ءُ اسپیت ریشانی جُھد ءَ پد، آجو کنگ بوتگ. اے ورنا ھماں وھدا آوار جنگ بوتگ، کہ وتی پت ءِ ھوری ءَ کار ءِ جاہ ءَ، کاری ءَ دست گٹ ءُ دِلگوش بوتگ.
دست کپتگیں ویڈیو رکاڈ ءَ پیش داشتگ کہ دو بے نمبر پلیٹیں گاڑیانی سلاہ بندیں نندوکان ءَ ادریس ءِ کار ءِ جاہ ءَ داشتگ ءُ آئی ءَ پہ زور وتی گاڑی سوار کرتگ ءُ برتگ۔ ادریس ءِ پت ءَ آیانی دیم دارگ ءِ جُھد کُرتگ، بلے آیان ءَ گوں وتاس ءِ بیم ءَ آئی ءَ پشت ءَ کنزینتگ.
داں اے ساھت ءَ، آوار جنوکان ءُ اے ورنائے چیر دیگ ءِ جاگہے بابت ءَ گیشیں ھالے دست نہ کپتگ۔ بلے مردمان ءَ کماش ءُ اسپیت ریشانی جُھد ءَ پہ ادریس ءِ آجو کنگ ءَ ساڑینتگ.
اے پیمیں ویل ءُ واکانی گیش بوھگ ءُ امنیتی باسکانی وت سر بئیگ، اے ویلانی ھلاپ ءَ گام نہ زورگ ءَ، مردمان ءُ جھمنندانی بہروسہ سرکار ءِ سرا روچ پہ روچ ءَ کمتر کرتگ.
Be the first to comment