شستون ءَ، آروسی دیوانے سرا بلوچے کارچ وارتگ ءُ کُشگ بوتگ

رَسانک نیوز/ پنچشمبے روچ 22 ھرداد ماہ 1404 ءَ، شستون ءِ زنگیان دمگ ءَ آروسی دیوانے سرا بلوچے کارچ شاپ ءُ کُشگ بوتگ.

کُشگ بوتگیں بلوچے پجّار «یھیی چاکری»، 22 سالگ، ابدل رزاک ءِ چُک، شستون ءِ پُرہ کنت دمگ ءِ نندوک زانگ بوتگ.

رَسانک ءِ ھال سرکنوکان ءَ گوشتگ: زنگیان ءَ، آروسی دیوان ءُ مِھپل ءِ سرا پہ زانگ نہ بوتگیں سوبے ءَ کارچ شاپ ءُ سکّ ءَ ٹپیگ بوتگ. نادراہجاہ ءَ سربوھگ ءَ پیسرا آئی ءَ ساہ داتگ ءُ بیران بوتگ.

گوشگ لوٹیت سال 2024 ءَ، 469 بلوچے سرا بے پجّارین ءُ سلاہ بندیں مردمان ءَ اُرش کرتگ کہ 284، بلوچ کُشگ ءُ 185 دگہ ٹپیگ بوتگ اَنت. اے میان ءَ 47 چُک ءُ جنیں آدم ھور اَنت، آیان ءِ میان ءَ 17 چُک کُشگ ءُ 14 دگہ ٹپیگ بوتگ، 9 جنین آدم کُشگ ءُ 7 دگہ ٹپیگ بوتگ.