رَسانک نیوز/ یکشمبے 18 ھُرداد ماه 1404 ءِ بانگواه ءَ، کاین ءِ بندیگجاہ ءَ بلوچ بندیگے کہ پہ منشیات ءُ مواد ءِ الزام ءَ دزگیر کنگ بوتگ، بندیگجاہ ءِ کارمستران ءُ زمہ واران ءَ بید چہ آئی ءِ لوگ ءِ مردمان ءِ ھال دیگ ءُ گُڈ سریں گندوک ءَ آئی ءَ پاھو داتگ.
پاھو داتگیں بلوچ بندیگے پجّار «رھیم کریمی، (زاده کریمی)»، 32 سالگ، ھسین ءِ چُک، آروس کرتگ ءُ زھگے پت، زابل ءِ نندوک زانگ بوتگ.
ھال وش ءَ گوشتگ: رھیم دوازده سال دیمترا گُمبد کاووس ءِ شھر ءَ، پہ مواد ءُ منشیات ءِ الزام ءَ دزگیر کنگ بوتگ ءُ اُدے انکلاب آمیدگس ءَ آئی ءَ پاھو ءِ هُکم داتگ، چُنت ماه پیسرا چہ گُمبد کاووس ءِ بندیگجاہ ءَ پہ کاین ءِ (زرباریں ھُراسان) زندان ءَ شور دیگ بوتگ. آئی ءِ کیس پہ گیشتریں پٹ ءُ پول ءِ ھاترا ایران ءِ بُرزیں انساپ دیوکیں اداره ءَ، دیم دیگ بوتگ۔ بلے کاین بندیگجاہ ءِ کارمستران ءَ مزنیں ائید ءِ دومئیں روچ ءَ اچانک ءَ آئی ءَ پہ ایوکیں واڈ ءَ شور داتگ ءُ آں دگہ روچ ءَ پاھو داتگ ءُ آئی ءِ کھول ءُ لوگ ءِ مردمان ءَ، رھیم ءِ پاھو دیگ ءِ ھال اِش داتگ ءُ گوشتگ پہ رھیم ءِ جون ءِ دست گِرَگ ءَ کاین ءِ بندیگجاہ ءَ برو اَنت.
سال 2024 ءَ، 111 بلوچ بندیگ ماں ایران ءِ 23 شھر ءَ پاھو دیگ بوتگ۔ اے میان ءَ 83 بندیگ پہ مواد ءُ منشیات ءِ الزام، 25 بندیگ پہ ھون ءُ کوش ءِ الزام ءُ 3 بلوچ بندیگے پاھوے سوب داں ھنگت ءَ زانگ نہ بوتگ.
Be the first to comment