رَسانک نیوز/ چارشمبے سُہب ءَ 21 ھُرداد ماه 1404 ءَ، دُزاپ ءِ جام جم میتگ ءَ بے پجّارین ءُ سلاہ بندیں مردمان ءَ بلوچیں مکانیکی ءَ چہ آئی ءِ کار ءِ جاه ءَ آوار جتگ.
اے بلوچ ءِ پجّار «ادریس ھسنزھی (تاکتی)»، 21 سالگ، اکبر ءِ چُک، دُزاپ ءِ نندوک زانگ بوتگ.
اے ھال ءِ رِد ءَ، آوار جنگ ءِ وھدا ادریس ءُ آئی ءِ پت وتی کار ءِ جاه ءَ یک گاڑئے بریک ءِ شر کنگ ءَ دست گٹ بوتگ اَنت کہ سہب ءِ 9:30 ءَ، دو زاتی گاڑی ءَ آیانی دکان ءِ دپ ءَ داشتگ. گاڑیانی نندوکیں مردماں کارئے نیمون ءَ، دکان ءَ تہا بوتگ اَنت ءُ پہ پل ملی ءَ ادریس ءَ وتی گاڑی ئے نزّیک ءَ بُرتگ ءُ زور ءِ سرا آئی ءَ وتی گاڑی ءَ سوار کرتگ ءُ بُرتگ. ادریس ءِ کماش کہ جاه ءَ اُشتوک بوتگ، آوار جنوکانی دیم دارگ ءِ جُھد کُرتگ بلے آیان ءَ گوں وتاس ءِ بیم ءَ ادریس ءِ پت ءَ پشت ءَ کنزینتگ.
ویڈیو رکاڈ ءَ آوار جنوکانی گستاھی ءُ نہ ترسی ءَ شرّی ءِ سرا پیش داشتگ کہ آیان ءَ چہ وڑ ءَ ماں روچ ءِ رُژن ءَ، رشّ ءُ کشّیں دمگی ءَ ادریس آوار جتگ.
Be the first to comment