گلستان ءَ سلاہ بندیں مردمان یک بلوچ جھمنندے کارچ کرتگ ءُ کُشتگ

رَسانک نیوز/ یکشمبے روچ 18 ھُرداد ماه 1404 ءَ، گلستان ءِ رامیان شھر ءِ کره‌کاچ دمگ ءَ سلاہ بندیں مردمان ءَ، یک بلوچ جھمنندے کارچ کرتگ ءُ کُشتگ.

کُشگ بوتگیں بلوچے پجّار «مھمد سارانی»، ھسن ءِ چُک، بُندر ءَ بلوچستان ءِ مردم ءُ ھنّیگیں وھداں گلستان ءِ رامیان شھر ءِ کره‌کاچ دمگ ءِ جھمنند زانگ بوتگ.

اے ھال ءِ رِد ءَ، لھتیں سلاہ بندیں مردم مھمد ءِ سرا اُرش کرتگ ءُ آئی ءَ دل ءِ سرا کارچ جتگ، مھمد ءَ جاه ءَ ساہ داتگ. داں اے ساھت ءَ جنوکان ءُ آیانی سوب چہ اے بلوچ ءِ کُشگ ءَ زانگ نہ بوتگ.

گوشگ لوٹیت که سال 2024 ءِ تھا 469 بلوچے سرا سلاہ بندین ءُ بے پجّاریں مردمان ءَ اُرش کرتگ، اے میان ءَ 284، بلوچ کُشگ ءُ 185 بلوچ ٹپیگ بوتگ اَنت۔ آیانی تها 47 زھگ ءُ جنیں آدم ھور اِنت۔ اے میان ءَ 17 زھگ کُشگ ءُ 14 ٹپیگ بوتگ اَنت، ھمیں پیم 9 جنیں آدم کُشگ ءُ 7 جنیں آدم ٹپیگ بوتگ اَنت.