رَسانک نیوز/ سئےشمبے روچ 13 ھُرداد ماہ 1404 ءَ، بلوچیں زھگی کہ ماں تاریک 11 ھُرداد ماہ ءَ پژو 405 ءِ بے پجّاریں نندوکان ءَ چہ جالک ءِ امنیتی باسک ءِ سرکاری لوگان ءِ نزّیک ءَ آوار جتگ، پد چہ 48 ساھت ءَ ھنگت ءَ بیگواہ اِنت. داں اے وھدا آوار جنوکان ءَ گوں زھگے لوگ ءِ مردمان ءَ وتی لوٹ نہ گوشتگ.
اے بلوچیں زھگ ءِ پجّار «ھسیب ملکزادہ» 13 سالگ، ھاجی مھتاج ءِ چُک، جالک ءِ نندوک زانگ بوتگ.
رَسانک ءِ ھال سرکنوکان ءِ رِد ءَ، بے پجّاریں مردمان ءَ اے زھگ چہ جالک ءِ سورو دمگ ءَ زور ءِ سرا وتی گاڑی ءَ سوار کرتگ ءُ آوار جتگ. زھگ ءِ لوگ ءِ مردمان ءَ گوشتگ: مارا گوں ھچ کس ءَ، دے گری نیست اِنت.
ھال سرکنوکان ءَ گوشتگ: اگاں آوار جنوکان ءَ گوں ھسیب ءِ پت یا کہ لوگ ءِ مردمان ءَ اَڑ ءُ جیڑے یا کہ دگہ دے گری است، زھگے پشت ءُ پد ءِ مردم گوں آوار جنوکان ءَ پہ ھبر ءُ جیڑے سندگ ءَ تیار اَنت. اگاں اے زھگ دگہ مردمئے جاہ ءَ نہ زانتی ءِ سرا آوار جنگ بوتگ آئی ءَ آجو بہ کن اَنت.
آوار جنوکان ءِ پجّار ءُ آیانی سوب چہ اے زھگ ءِ آوار جنگ ءَ زانگ نہ بوتگ. رَسانک ءَ چہ جھمنندان ءَ دزبندی کرتگ اگاں آیان ءَ گیشتریں ھال ءُ سرپدیئے، آوار جنوکان ءُ اے ویل ءِ درگت ءَ دست بہ کپیت پہ رَسانک ءَ سر بہ کن اَنت.
Be the first to comment