رَسانک نیوز/ پنچشمبے شپ ءَ 8 ھُرداد ماه 1404 ءَ، آھوران ءَ گہ ءِ سریں بجوکان ءِ دمگ ءَ بلوچے جنین آدمی ءَ مارا ڈنگ جتگ ءُ آئی ءَ ساہ داتگ. مارا اے بلوچے جنیں آدم ءَ ماں آئی ءِ لوگ ءَ ڈنگ جتگ ءُ نادراہجاہ ءِ راه ءَ آئی ءَ ساہ داتگ.
بیران بوتگیں بلوچے جنیں آدم ءِ پجّار «میرھاتوں آھورانی» 40 سالگ، ریکی ءِ چُک، سئے زھگ ءِ مات، گہ ءِ سریں بجوکان دمگ ءِ نندوک زانگ بوتگ.
اے ھال ءِ رِد ءَ، مارا اے جنین آدم ءَ لوگ ءِ تہا ڈنگ جتگ ءُ آئی ءِ مردمان ءَ پہ نادراهجاہ ءَ سر بوھگ ءَ وتی وس کرتگ، بلے شرّیں راه ءُ رھبندے نہ بوھگ ءَ آئی ءَ راه ءَ ساہ داتگ.
گوشگ به بیت: زھر داریں سیہ مار ماں بلوچستان ءِ لہتیں دمگاں ھنچش کہ شستون، سرباز، ایرندگان، گہ، راسک ءُ روچ در آتکیں بلوچستان ءِ لہتیں ھنداں پد اِش گندگ ءَ کیت. ھمُک سال ماں بلوچستان ءَ سیہ مارانی ڈنگ جنَگ ءِ ویل ءُ واک دیما کاینت، بلے داں ھنگت ءَ ایران ءِ سرکار ءُ آئی ءِ ایردستیں درمانے وزارت ءَ پہ مارانی زھراں ھچ پیمیں درمانی جوڑ نہ کرتگ.
Be the first to comment