دوست مھمد ءَ، سیم سراں چاروگیں باسک تیرگواری ءَ بلوچے کُشگ بوتگ

رَسانک نیوز، سئےشمبے بیگاھی 6 ھُرداد ماه 1404 ءَ، دوست مھمد (ھیرمند) ءِ ماککی دمگ ءَ سیم سراں چاروگیں باسک ءِ تَچکیں تیرگواری ءَ بلوچے کُشگ بوتگ.

کُشگ بوتگیں بلوچے پَجّار «الی مھمودی» 27 سالگ، ھسین الی ءِ چُک ءُ دوست مھمد ءِ نندوک زانگ بوتگ.

رَسانک ءِ ھال سرکنوکان ءَ گوشتگ: ساھت 11 ءِ وھد ءَ الی وتی ڈگار ءِ سرا کارا بوتگ کہ امنیتی باسک ءِ سیم سراں چاروگیں ٹولی ءَ بے جار ءُ توار دئیگ ءَ آئی ءِ سرا تیرگواری کرتگ کہ الی ءَ ماں سرا تیر وارتگ ءُ ساہ داتگ.

ھال سرکنوکان ءَ گیش کرتگ: امنیتی باسک ءِ ٹولی اے ویل ءَ پد، بے ترِپ ءُ توار ءَ در شُتگ اَنت. ھند ءِ نندوکان ءَ الی ءَ نادراہجاہ ءَ سر کنگ ءِ جُھد کرتگ، بلے بازیں ھون ءِ ریچگ ءَ آئی ءَ راہ ءَ ساہ داتگ ءُ بیران بوتگ.