رَسانک نیوز/ چارشمبے سُہب ءَ 7 ھُرداد ماه 1404 ءَ، دُزاپ ءِ نسرتآباد ءَ امنیتی باسک ءِ ٹولی ءَ یکیں وھد ءَ دو لوگ ءِ سرا اُرش کرتگ ءُ لوگ ءِ مردمان ءَ لٹ ءُ شاپ ءَ پد، یک بلوچے آوار جتگ ءُ چیریں آزار جاہ ءَ برتگ.
آوار جتگیں بلوچ ءِ پجّار «پژمان نارویی» 23 سالگ، نوربکش ءِ چُک، دُزاپ ءِ نسرتآباد ءِ نندوک زانگ بوتگ.
سر بوتگیں ھالان ءِ رِد ءَ، امنیتی باسک ءِ ٹولی ءَ سُہب ءِ ساھت شش ءَ یکیں وھد ءَ دو لوگ ءِ سرا اُرش کرتگ ءُ لوگ ءِ نندوکان ءَ لٹ ءُ شاپ کرتگ ءُ آیانی زاتی سامان پلتگ اَنت ءُ لوگ ءَ اُشتوکیں یک پٹ پٹی ھم زپت کرتگ ءُ گوں وت ءَ بُرتگ. آیان ءَ پژمان ءَ، آئی ءِ پیر ءُ آجزیں مات ءِ دیم ءَ سکّ ءَ لٹ داتگ ءُ بے میار ءُ گناه ءَ آوار جتگ ءُ چیک پوسٹ ءَ بُرتگ.
ھال سرکنوکان ءَ گوشتگ: امنیتی باسک ءِ ٹولی ءَ چیک پوسٹ ءِ تہا پژمان ءَ لٹ داتگ ءُ آئی ءِ پونز ءُ دست اِش پُرشتگ ءُ چہ چیک پوسٹ ءَ پہ چیریں آزار جاہ ءَ شور داتگ.
داں اے وهد ءَ پژمان ءِ ھال سر پدئے دست نه کپتگ ءُ آئی ءِ مات ءِ ھالت کہ چمّاں وت چک ءِ لٹ ءُ شاپ بوھگ ءَ دیستگ سکّ ھراب اِنت.
Be the first to comment