رَسانک نیوز/ زی دوشمبے 5 ھُرداد ماہ 1404 ءِ بانگواہ ءَ، دُزاپ ءِ بندیگجاہ ءَ یک بلوچ بندیگے پہ ھون ءُ کوش ءِ الزام ءَ پاھو دیگ بوتگ. اے بلوچ بندیگ ماھے دیمترا چہ ھوریں وارڈ ءَ پہ ایوکیں وارڈ ءَ شور دیگ بوتگ. بلے بندیگجاہ ءِ زمہ واران ءَ آئی ءَ یک ماہ ءِ وھد داتگ ءُ دوبارگ ماں ھوریں وارڈ ءَ دیم داتگ.
اے بلوچ بندیگ ءِ پجّار «زبیح اللہ سارانی» 29 سالگ، موسی ءِ چُک، آروس کرتگ ءُ دو زھگ ءِ پت، نیمروز ءَ ادیمی شھر ءِ نندوک زانگ بوتگ.
اے ھال ءِ رِد ءَ، زبیح اللہ ماں تاریک 6 پروردیں ماہ 1400 ءَ، زابل ءَ ھوریں اَڑ ءُ جیڑ ءُ ھشر ءَ پد، پہ ھون ءُ کوش ءِ الزام ءَ دزگیر ءُ زابل ءِ تاگزی بندیگجاہ ءَ زنداں کنگ بوتگ. ماں دی ماہ 1403 ءَ، پد چہ ایشی ءَ کہ پاھو ءِ هُکم دیگ بوتگ، آئی ءَ دزاپ ءِ بندیگجاہ ءَ دیم اِش داتگ.
اے بلوچ بندیگ ماں 22 پروردیں ماہ 1404 ءَ، چہ ھوریں وارڈ ءَ پہ ایوکیں وارڈ ءَ شور دیگ بوتگ، بلے بندیگجاہ ءِ زمہ واران ءَ آئی ءَ یک ماہ ءِ وھد داتگ داں رازی نامہ بہ کنت.
Be the first to comment