سرباز ءَ دھانی ءُ رسولی زادہ کٹھمدان ءِ میان ءَ سلاہ‌کاری بوتگ

رَسانک نیوز/ 1 ھُرداد 1404 ءَ، سرباز ءِ گنج آباد دمگ ءَ گوں کماش ءُ اسپیت ریشیں مردمانی میانجی گری ءُ جُھد ءَ، دھانی ءُ رسولی زادہ کٹھمدان ءِ میان ءَ سلاہ ءُ رازی نامہ بوتگ. دیمترا اے دوئیں کئوم ءِ میان ءَ اَڑ ءُ جیڑهے بوتگ، بلے پیسر چہ ایشی ءَ کہ اے جیڑہ گرانتر بہ بیت کماش ءُ اسپیت ریشانی جھد ءَ اے جیڑہ پہ وشّی ءُ شرّئے سرا سندگ بوتگ.

اے سلاہ ءِ دیوان ءَ سردار مھمد اسلام دھانی، مولوی مھمد ھنیپ دھانی، مولوی ابدل اھد ملازادہ، مولوی ابدلگپور دھانی، ھاجی اللہ بکش آسکانی، سوپی ابدل رشید دھانی ءُ ھاجی نزر مھمد ءَ وتی کماشی ءَ ھک شرّئے سرا پورا کرتگ.

بلوچ ءِ دود ءُ ربیدگ آیان ءَ مدام پہ سلاہ ءُ دوستی، یکّا دگرا ازّت ءِ دیگ، کماش ءُ مستریں مردمان ءَ پہ وتی زمہ واریانی پورا کنگ ءَ سر ءُ سوج کرتگ ءُ بلوچ ءِ دود ءُ ربیدگ ءِ بہر زانگ بنت. بلوچ سماج آیان ءَ سوج دنت کہ وتی اَڑ ءُ جیڑاں گوں اکل ءِ کارمرز کنگ ءَ بہ سند اَنت.