رَسانک نیوز/ چارشمبے 24 اردیبھشت ماہ 1404 ءِ بانگواہ ءَ اسپھان ءِ بندیگجاہ ءَ، یک بلوچ بندیگی کہ پہ مواد ءُ منشیات ءِ الزام ءَ دزگیر بوتگ، آئی ءِ کھول ءُ پشت پد ءِ ھال دیگ ءَ بید پاھو دیگ بوتگ. پاھو داتگیں بلوچ بندیگ ءِ لوگ ءِ مردم بازیں وھدے چہ وتی چُک ءِ ھال ءَ بے ھبر بوتگ اَنت، آیاں پہ وتی چُکے ھال ءِ سرپدی ءَ کہ اسپھان ءِ بندیگجاہ ءَ رو اَنت، نوں چہ اے ویل ءَ سہیگ بنت.
پاھو داتگیں بلوچ بندیگ ءِ پجّار «مھمدنئیم دانشی» 40 سالگ، اُسمان ءِ چُک، آروس کرتگ ءُ یک زھگ ءِ پت، بُندر ءَ پھرگ ءِ اھمد آباد دمگ ءِ جھمنند زانگ بوتگ.
ھال وش ءِ ھال ءِ رِد ءَ ، مھمدنئیم ھپت سال دیمترا اسپھان ءَ پہ منشیات ءُ مواد ءِ الزام ءَ دزگیر بوتگ ءُ اے شھر ءِ انکلاب آمیدگِس ءَ آئی ءَ پاھو ءِ ھُکم داتگ۔ چارشمبے 24 اردیبھشت ماہ 1404 ءَ، ماں اسپھان ءِ بندیگجاہ ءَ بید آئی ءِ لوگ ءِ مردمان ءِ ھال دیگ ءَ، پاھو دیگ بوتگ. آئی ءِ لوگ ءِ مردم پاھو دیگ ءَ پد، چُنت روچ چہ وتی چُکّ ءِ ھال ءَ بے ھبر بنت، ایشی ءَ پد اسپھان ءِ بندیگجاہ ءَ رو اَنت ءُ چہ آئی ءِ پاھو دیگ ءَ سہیگ بنت۔ نئیم ءِ لوگ ءِ مردم پاھو دیگ ءَ پنچ روچ ءَ پد آئی ءِ جون ءَ چہ اسپھان ءِ مردگ جاہ ءَ دست گر اَنت.
پاھو دیگ ءَ پیسر، بندیگ ءَ پہ گڈ سریں گندوک ءَ نہ ھلّگ، آئی ءِ لوگ ءِ مردماں ءَ سہیگ نہ کنگ، انسانی ھکّانی ھِلاپ زانگ بیت. اے وڑیں ویل ءُ واکاں ایران ءِ سرکار ءِ بلوچانی سرا زوراکی ءُ نا انساپی ءَ گیشتر پدّر کن اَنت.
Be the first to comment