مولوی عبدالحمید ءِ جُھد ءَ، شستون ءِ دو کبیلہ ءُ کٹھمدان ءَ بے ڈکّ ءُ شرت ءَ رازی نامہ کرتگ

رَسانک نیوز، 8 اردیبھشت ماہ 1404 ءَ، شستون ءَ مولوی عبدالحمید ءِ جُھد ءُ کوشست ءَ پد، دو کٹھمدان ھمتی (سُندک زھی) ءُ نھودزھی (اَردی زھی) ءِ میان ءَ رازی نامہ ءُ سلاه بوتگ. اے سلاه ءُ رازی نامے دیوان گوں مولوی عبدالحمید ءِ مستری ءُ سروکی ءَ ماں شستون ءِ بکشان دمگ ءِ جامع مسیت ءَ برجم دارگ بوتگ، اے دیوان ءِ تہا شستون ءِ گچتگ اِیں مردمان ءُ اسپیت ریشاں، دینی زانتکاران ءَ بہر زورتگ.

اے دیوان ءَ دوئیں کٹھمدان ءِ مردماں پیسرا مولوی عبدالحمید ءِ گپّ شرّی سرا گوش کرتگ اَنت ءُ آئی ءِ پد، دوئیں کٹھمدان ءِ سروکاں وتی ھبر درشان کرتگ، ایشی ءَ رَند آیان ءَ بے ڈکّ ءُ شرت ءَ رازی نامہ ءُ سلاه ءِ کاگد دست ھت کرتگ اَنت.

اے رازی نامے دیوان، دینی عالمان ءُ کماش ءُ اسپیت ریشانی ازت ءَ ماں بلوچ راج ءُ سماج ءَ پیش داریت. بلوچ سماج ءِ تہا چہ‌عہدی دوراں بگر داں کہ ھنیگیں وھداں کماش ءُ سروکیں مردمان ءَ ماں بلوچ راج ءَ ھاسیں ازت ءُ مکامی بوتگ ءُ آیان ءَ ھم وتی کردار پہ بلوچ راج ءِ سکّی ءُ سوراں، اَڑ ءُ جیڑان ءِ گیشینگ ءَ شرّی ءِ سرا ادا کرتگ. ھاس کار ھنیگیں وھد ءَ کہ سرکار پہ بلوچ راج ءُ سماج ءِ سکّیانی ھل کنگ ءَ پہ سِدک ءُ دل ءَ نہ اِنت، راج ءِ مستریں مردمان ءَ لوٹیت کہ وتی کرد ءَ ادا بہ‌کن اَنت.