چار سلاه بندیں بلوچ ءُ یک گجری چہ امنیتی باسک ءِ کارکنوکاں، ماں تبس ءِ لوت ءَ دیم پہ دیم کپگ ءُ دو نیمگی تیرگواری ءَ بیران ءُ ٹپیگ بوتگ اَنت

رَسانک نیوز، شمبہ ءِ روچ 23 پروردین 1404 ءِ بانگواہ ءَ لہتیں سلاه بندیں بلوچ گوں امنیتی باسک ءِ ٹولی ءَ ماں تبس ءِ لوت ءَ (زِر باریں ھُراسان ءِ بہر اِنت) دیم پہ دیم کپتگنت ءُ آیان ءَ گوں یک ءَ دگر ءَ جنگ داتگ ءُ تیرگواری کرتگ۔ اے تیرگواری ءِ سوب ءَ چار بلوچ بیران بوتگ ءُ یک گجری چہ امنیتی باسک ءِ ٹولی ءَ ٹپیگ اِنت۔ گوشگ بوتگ کہ گجرے ٹولی ءَ پیسرا آیانی راہ بستگ ءُ کمین ءَ نشتگ اَنت، سکیوریٹی فورسز ءِ باسک ٹپیگ بوھگ ءَ پد، نادراھجاہ ءَ سر کنگ بوتگ ءُ چہ مرگ ءَ رکّتگ، اے وھد ءَ آئی ءِ هالت دیم پہ وشّی اِنت.

بیراں بوتگیں بلوچانی پجّار، «مھمد شہ‌بخش» ھان مھمد چُک، «رھمت‌اللہ کنبرزھی» محمد آسا چُک، «ایوب کنبرزھی» جنگیان چُک ءُ یک نپری چہ «توتازھی» کٹھمدان ءَ زانگ بوتگ.

رسانک ءِ ھال سر کنوکانی گوشگ ءِ رِد ءَ اے تمامیں نپراں بُندر ءَ دُزاپ ءِ سرجنگل ءُ کورین ءِ دمگ ءِ نندوک بوتگ اَنت.

زِر باریں ھراسان ءِ فوجی کمانڈرانی مستر حسن شجاعی نسب ءَ وتی ھبرانی تہا بیران بوتگیں چاریں بلوچان ءَ کاچاک کش ءُ اسمگلر زانتگ ءُ گوشتگ ما آیان ءَ گرانیں جھڑپی ءِ تہا جتگ.

واکدارانی بے دلگوشی چہ امن ءُ ایمنی ءِ زمانت ءُ مردمانی گوں دیم پہ دیم بوھگ ءِ تہ ءَ زوراکی ءِ رھبنداں چہ رکّینگ ءَ، ھاسیں رنگ ءَ بلوچستان ءِ جتا جتائیں دمگاں، اے وڑیں انسانی مشکلانی جوڑ بوھگ ءِ مستریں سبباں چہ یکے برجاہ اِنت کہ ایشی ءَ چہ راج ءِ تہ ءَ بے باوری گیش بوتگ.