رَسانک نیوز، زی سہ شمبہ ءِ روچ 26 فروردین 1404 ءَ سپاہ ءِ پاسداران ءَ پیرکور ءِ سیم سراں پهک بستگ ءُ مُھر کتگ۔ پیرکور یکے چہ بلوچستان ءِ نامیئں سیم سران ءُ دَراں گوں ھم دپیں کار ءُ باری راھاں زانگ بیت. پیرکورے بندگ ءَ پد، ھزاراں نپر بلوچ ڈیزل کشوک چہ کار ءُ روزگار ءَ کپتگ اَنت ءُ بے کار اَنت۔ ڈیزل کشّان ءَ بید اے دگہ بلوچ سوداگران ءُ کار باری مردماں ھم چہ کار ءَ کپتگ اَنت.
ائیران ءِ سرکار ءُ آئی ءِ لشکری دستہ ءَ جھمنندیں مردمان ءَ شَور نہ کرتگ ءُ وت سر سیم سرانش بستگ اَنت. سرکار ءَ پہ بے کار بوتگیں جھمنندان ءِ زند ءِ ھالات ءِ گهتری ءَ ھچ پیمیں گام گیجی نہ کرتگ. ھال سرکنوکان ءَ گوشتگ ماں بلوچستان ءَ چہ سرکار ءِ بے پرواھی ءَ ھچ وڑیں پکّائیں کاری نیست اِنت.
بلوچستان ءِ جھمننداں چہ ناچاری ءُ پہ لاپ ءِ شوھاز ءَ ڈیزل کشی ءِ وڈیں بے سریں کاران‌اش دست مان کرتگ۔ ڈیزل کشی ءِ بند بیئگ ءَ پد، بلوچستان ءِ بازیں دمگ جرم ءُ ناشرکاریاں گیش بوھگ اَنت.
Be the first to comment