وکیل آباد بندیگ‌جاه ءَ ماں مشھد یک بلوچ بندیگی پاھو کنگ بوتگ

رسانک نیوز/ چارشمبه ءِ بانگواہ ءَ 20 پروردین 1404، یک بلوچ بندیگی پہ کتل ءِ الزام ءَ ماں مشھد ءِ وکیل آباد بندیگجاه ءَ پاھو ءَ کنگ بوتگ.

اے زندانی ءِ پجّار «سجاد براھویی» 22 سالگ، سرهس شھر ءِ شلگمی سلفی ھلک ءِ جھمنند، زانگ بوتگ.

رستگیں ھالانی رِد ءَ ماں بھمن ماہ 1402 ءَ سجاد ماں مشھد ءُ میامی ءِ راہ ءَ گوں کُشگ بوتگیں مردم ءَ دپ کپتگ ءُ قازقان ءِ ھند ءَ گوں آیی ءَ اڑ ءُ جیڑ بوتگ بلے پیسرا ھما بیران بوتگیں مردم وتی چاکو ءَ درا کنت ءُ پہ سجاد ءِ جَنَگ ءَ درکئیت، سجاد ھمائی ءِ چاکو ءَ پچ گریت ءُ ھمائی ءَ جنت ءُ آں مرد بیراں بیت.

آمیدگس ءَ اے گپ پیش کنگ بوتگ کہ سجاد ءَ پہ وتی جند ءِ ساہ ءِ رکّینگ ءَ اے کار کرتگ بلے کازی ءَ سجاد ءِ اپیل نہ منّتگ ءُ پاھو بوھگ ءِ سزا داتگ. سجاد سہ شنبہ روچ ءَ گوں وتی کھول ءُ لوگ ءِ مردماں گُڈیگیں گِند ءُ نند کرتگ.