پهرها چار جهمنندێن مردم که دو کسانێن چُکّ هم بوتگ‌اَنت گۆن سلاهبندێن مردمانی تیرگواریان کُشگ و ٹپّیگ بوتگ‌اَنت

رَسانک نیوز

جمهئے شپا ۱۹ بهمن ۱۴۰۳، سلاهبندێن مردمان یک پژو ۴۰۵ێن ماشینیئے نێمگا تیرگواری کُرتگ که سئے مردم گۆن یک کسانێن چُکیا کُشگ بوتگ‌اَنت و دگه یک چُکّے گۆن تیرئے لگّگا ٹپّیگ بوتگ.

کُشگ بوتگێن جهمنندانی پجّار (شهرام بهادرزهی)، اَزیزئے چُکّ، (گُل اهمد بهادرزهی)، نبیئے چُکّ، (سارا بهادرزهی)، پنچ سالگ گل اهمدئے چُکّ و ٹپّیگ بوتگێن چُکّئے پجّار (اِمران بهادرزهی)، گل اهمدئے چُکّ و دراهێن پهرهئے نندۆک گوَشگ بوتگ‌اَنت.

گوَشگ بیت که اے درگیری پێسرێن جێڑهیئے سئوبا بوتگ و سلاهبندێن مردمان پد چه تیرگواریا چه اۆدا شتگ‌اَنت.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.