دُزآپا مهمد کبدانی که نزامی نیروانی دستا کُشگ بوتگ آییئے لاش هاکا کنگ بوتگ

رَسانک نیوز

یکشَمبِهئے رۆچا ۲۱ بهمن ۱۴۰۳، مهمد کبدانیئے لاش بلۆچ جهمنند که نزامی نیروانی دستا کُشگ بوتگ هاکا کنگ بوتگ.

گوَشگی اِنت اێرانئے مجاوری اسلامیئے رژیم بلۆچستان و سیستانئے اُستانا گۆن اے جهمنندئے کُشگئے کبول کنگا، گوشتگش که آیی سلاهبندێن دُزّانی تیرانی آماچ بوتگ.

سرهنگ اَلیرزا دلیری، بلۆچستانئے انتزامیئے جانشین، گوَشتگی که سه سلاهبندێن دُزّ دُزآپا چه یک جهمنندیا دُزّی کنگا بوتگ‌اَنت که گۆن پلیسئے آیگا، یکّے چه آیان کُشگ و دگه دو مردم تتکگ‌اَنت. آییا گوشتگ که اے درگیریا چه اِشان یک کُلت کمری و یک شکاری سلاهے و یک چانکوے و موبایل درگێجگ بوتگ.

اِشی چُش اِنت که چه ائولا مردمان گوشتگ نزامی نیروانی بے کانونیێن تیرگواری اے وئیلئے سئوب بوتگ که مهمد کبدانی و آییئے همراه تیرگواریئے وهدا (سالارئے کاپه و ساندویچیا) بوتگ‌اَنت.

انتزامی نیروان پێسر چه هُشدار دئیگا، لهتے چه ورناێن مردم که کاپها بوتگ‌اَنت آوار جتگ و لهتیئے دێمگیریئے سئوبا تیرگواری بوتگ. اے وئیلئے سئوبا، مهمد کبدانیا وتی ساه چه دستا داتگ، هامد کبدانی و اهمد نهتانی ٹپّیگ و دو مردم که آیانی هلکی نام نهتانی گوَشگ بوتگ آوار جنَگ بوتگ‌اَنت.

اے تیرگواری و بلۆچ جهمنندئے ساهئے دئیگ، پدا مردم چه امنیتی نیروانی زۆر و چه آیانی درۆگان پد چه اے وئیلا پرێشان بوتگ‌اَنت.