دلگانا سئے مردم چه پنچ مردمے که گۆن دو ماشینئے ڈیکّر ورگا بێران بوتگ‌اَنت پجّار کنگ بوتگ‌اَنت

رَسانک نیوز

دوشمبهئے رۆچا ۱۵ بهمن ۱۴۰۳، گۆن دو ماشینئے ڈیکّر ورگا که یکّے ٹێلکشێن سمندے و دگه یکّے تویوتا هایلوکسے که سئوب بوتگ تویوتا آس بگیپت، اے دوێن ماشینانی پنچ مردم بازێن ٹپّانی سئوبا وتی ساهش چه دستا داتگ.

بێران بوتگێن مردمانی پجّار (یوسُپ شیبانی)، نبی بکشئے چُکّ، (پرزاد نارویی)، ناسرئے چُکّ، (اسماێل نارویی)، مهمدئے چُکّ گوَشگ بوتگ‌اَنت و چه دوێن ٹێلکشێن مردمانی پَجّارا تنیگت هالے نێست.

گێشێن هالانی رِدا، اے دوێن ماشینانی دێم په دێما ڈیکّر وارتگ و ٹێلانی شِنگ بئیگئے سئوبا، سئے جهمنند که تویوتائے تها سئوار بوتگ‌اَنت گۆن دوێن ٹێلکشێن مردمان آس گپتگ‌اَنت و آسئے تها وتی ساهِش چه دستا داتگ.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.