دشتیاریا ٹێلکشێن ماشینانی نێمگا تیرگواری بوتگ و یکّے آوار جنَگ بوتگ

رَسانک نیوز

سئے شَمبِهئے رۆچا ۱۶ بهمن ۱۴۰۳، نزامی نیروان کئورگوتئے هلکا رێمدانئے سیمسرئے دمگان دشتیاریا، ٹێلکشێن ماشینان نێمگا تیرگواری کُرتگ. اے کارئے سئوبا یکّے چه ماشینانی راننده آوار جنَگ و پد چه چُنت ساهتا آزات کنگ بوتگ.

چه بلۆچ جهمنندئے پَجّارا تنیگت هالے نێست.

گێشێن هالانی رِدا، اے تیرگواریئے سئوبا، ٹێلکشان هچ جانی نُکسے ندیستگ بله یک ٹێلکشێن ماشینا سک نُکس دیستگ که ماشینئے لاستیک تیرانی آماچ بوتگ و اۆشتارێنگ و آییئے بار نزامی نیروانی دستا برگ بوتگ.

ٹێلکشانی سرا پشار دئیگ بئیگا اِنت بله تنیگت لاهکێن کارئے په آیان بازارانی تها جۆڑ کنگ نبوتگ. اُگدهدارانی پسئو ندئیگ و اے کارانی گێشی، بازێن مردمیئے زندگیا تهدید کنگا اِنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.