سێب و سۆرانا یک بلۆچ ٹێلکشے گۆن ماشینئے چپّ کنگا ٹپّیگ بوتگ

رَسانک نیوز

سئے شمبهئے رۆچا ۲ بهمن ۱۴۰۳، گۆن یک ماشینیئے چپّ کنگئے گۆما کساس رهمت آبادئے سئے راهیا سێب و سۆرانا، آس سۆچیئے سئوب بوتگ و راننده ٹپّیگ بوتگ.

چه اے بلۆچ جهمنندئے پَجّارا که گوَشگ بیت که مهرستانئے مردم اِنت تنیگت هالے نێست.

اے وئیل کساس ساهت شش و نێما پسکۆه و سۆرانئے دمگان پێش آتکگ که ٹێلکشێن ماشین گۆن نامالومێن سئوبیا چه وتی راها در و چپّ بوتگ که پد چه آییا آس گپتگ و ماشینئے راننده ٹپّیگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.