راسکا یک بلۆچ ٹێلکشے گۆن ماشین و منڈیئے آس گِرگا و آس کۆشی امکاناتئے نبئیگئے سئوبا ٹپّیگ بوتگ

رَسانک نیوز

سئے شَمبِهئے رۆچا ۲۵ دئے ۱۴۰۳، یک ٹێلکشێن ماشینے هێت کارگاها چه راسکئے دمگان، یک منڈیا آس گپتگ، آس کۆشی امکاناتئے نێستیئے سئوبا ماشین آس گپتگ و رانندها لۆٹتگ که ماشینا چه اۆدا در بکنت آس گپتگ و ٹپّیگ بوتگ.

چه اے بلۆچ ٹێلکشئے پَجّارا تنیگت هالے نرستگ.

گوَشگ بیت که ٹێلکشێن ماشین منڈیئے تها بار جنَگا بوتگ که نامالومێن سئوبیا آس گپتگ و راننده، آسئے دور کنگئے واستا ماشینا سئوار بوتگ و آیی کارواشا بُرتگ بله نزیکیا کارواش نبوتگ و اۆدا رسێنتی نکُرتگ و مجبور بوتگ ماشینا شێپئے تها دئور بدنت که اے وئیلئے سئوبا راننده چه کمر و دستئے نێمگا سُتکگ.

اے هلکا، دُکان و ماشینئے سُچگ هر رۆچیگێن کاریا بدل بوتگ بله آتش نشانی و آس کۆشیئے نبئیگئے سئوبا مردم هچ وڑێن همایتے نگندگا اَنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.