راسکا یک بلۆچێن دینی وانگجاهے سلاهبندێن مردمانی دستا دُزّگ و جنگ بوتگ

رَسانک نیوز

شمبهئے شپا ۸ دئے ۱۴۰۳، راسکا یک دینی وانگجاهیئے وانندهے چه پشامگئے دینی وانگجاها، سلاهبندێن مردمانی دستا دُزّگ و پد چه آییئے جنَگ و پلپلی اسپره آییئے چمّان جنَگا، بازارئے تها وئیل کنگ بوتگ.

اے دینی وانندهئے پجّار (مهاز ابروپراه) کساس ۱۸ سالگ، دادمهمدئے چُکّ و ششگیێمئے نندۆک چه راسکئے دمگان گوَشگ بوتگ.

گێشێن هالانی رِدا، کساس شپئے ساهت هپتا، سلاهبندێن مردم نُک مدادێن ماشینیا سئوار بوتگ‌اَنت و اے نۆدربرش چه پشامگئے دینی وانگجاهئے دپا دُزتگ و پد چه اِشیا که آییئے چمّش بستگ‌ و آییئے دێما پلپلی اسپر و آییش پشامگئے دمگان بُزتگ و آییش جتگ و پد چه چُنت ساهتا وئیلش کُرتگ.

چه دُزّۆکانی دُزّگئے سئوبا و آیانی پَجّارا تنیگت هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.