ریگانا یک بلۆچ ٹێلکشے گۆن نزامی نیروانی تیرگواریان ٹپّیگ بوتگ

رَسانک نیوز

شَمبِهئے رۆچا ۸ دئے ۱۴۰۳، نزامی نیروان ریگانا، کساس هشتسد متریا یک ٹێلکشّێن ماشینیئے نێمگا بێد چه پێسری اۆشتارێنگا راستێن تیرگواری کُرتگ که راننده گۆن دو تیرئے لگّگا ٹپّیگ بوتگ.

اے ٹپیگێن ٹێلکشّئے پجّار (وهید براهویی)، ۲۱ سالگ، گل اهمدئے چُکّ و واشئے نندۆک گوَشگ بوتگ.

گوَشگ ببیت که ریگانئے نزامی نیرو که گۆن زاتی پُچ و ماشینان کساس نۆکێن ایست بازرسیئے سرا که ریگانئے پنچ کیلومتریا اِنت بوتگ‌اَنت و وهیدئے ماشینئے دێما اۆشتاتگ و بێد چه اِشیا که آییا اۆشتارێننت تیرگواریش کُرتگ و وهید گۆن دو تیرئے لگّگا مان گردن و دستا سکّ ٹپّیگ و آمبولانسئے گۆما ریگانئے نادراهجاها برگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.