زرآبادا یک بلۆچ ٹێلکشے گۆن ماشینئے چپّ کنگا بێران بوتگ

رَسانک نیوز

یکشَمبِهئے رۆچا ۲ دئے ۱۴۰۳، یک بلۆچ ٹێلکشّیئے ماشین گۆن نامالومێن سئوبا چه راها در بوتگ و پُهلئے چێرا کپتگ که ماشینئے راننده گۆن بازێن ٹپّان وتی ساهی چه دستا داتگ.

اے بلۆچ ٹێلکشئے پجّار (داود همّلی)، انورئے چُکّ و مانشئے هلکئے مردم چه مهرستانئے دمگان گوَشگ بوتگ.

گوَشگ بیت که داودئے ماشین گۆن نامالومێن سئوبیا چه جادها در بوتگ و پد چه اِشیا که پُهلئے چێرا بکپیت چپّ بوتگ که داود گۆن بازێن ٹپّانی گۆما وتی ساهی چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن سئوبیا هم کم چه کم ۱۴ کس ٹپّیگ و بێران بوتگ.