دُزآپا یک بلۆچ ٹێلکشّے پد چا اِشیا که یک مات و چُکّے چه آسا بچّارێنتگ، بێران بوتگ

رَسانک نیوز

سئے شَمبِهئے رۆچا ۴ دئے ۱۴۰۳، یک بلۆچ ٹێلکشّیا پد چه اِشیا که یک ماتے و چُکّے چا آسا بچّارێنتگ امباریئے آس گِرگئے سئوبا که گالن آس گپتگ‌اَنت وتی ساهی چه دستا داتگ.

اے بلۆچ ٹێلکشّئے پجّار (اَبدُل رئوپ شاهوزهی)، اَبدُل اَزیزئے چُکّ و پنچ چُکّئے پت و دُزآپئے نندۆک گوَشگ بوتگ.

گوَشگی اِنت که آس سۆچی چه یک ٹێلی چراگیا بِندات بوتگ و زوتا ٹێلئے گالنان رستگ و اَبدُل رئوپ وتی براتئے چک و آییئے مات آسئے تها دیستگ‌اَنت و هر دوێن چه آسا بچّارێنتگ و آییا وت آسئے بازیئے سئوبا چه امبارا درآتک نکُرتگ و وتی ساهی چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.