رَسانک نیوز
چارشمبهئے شپا ۵ دئے ۱۴۰۳، سلاهبندێن مردمان آزادگان ۹ئے هئیابانا دُزآپا، سئے ورناێن موتور سئوارش تیرانی آماچ کُرتگ و اِشیئے سئوبا یکّے چه اے ورنایان وتی ساه چه دستا داتگ و دو کس دگه ٹپّیگ بوتگ‌اَنت.
اے کُشگ بوتگێن ورنائے پجّار (کاسم رهمت زهی)، ۱۶ سالگ، ماروپ په یوسپ، مهمدگلئے چُکّ و ٹپّیگ بواگێن ورنائے پجّار (یاسین براهویی) ، (سئیید براهویی) کساس ۱۷ سالگ، اَبدُل رهیمئے چُکّ و هر سئیێن دُزآپئے نندۆک گوَشگ بوتگ‌اَنت.
گێشێن هالانی رِدا، سلاهبندێن مردم که پژو پارسیا سئوار بوتگ‌اَنت اے ورنایانی موتورئے نێمگا راستێن تیرگواری کُرتگ که اے سئیێن موتور سئوار تیرانی آماچ بوتگ‌اَنت که یکّے چه آیان جاه په جاها وتی ساهی چه دستا داتگ و دگه دو مردم ٹپّیگ بوتگ‌اَنت.
چه جنۆکانی جنَگئے سئوبا و آیانی پَجّارا تنیگت هالے نێست.
گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.
Be the first to comment