دُزآپا یک بلۆچ ٹێلکشے گۆن سلاهبندێن مردمانی تیرگواریان ٹپّیگ بوتگ

رَسانک نیوز

سئے شَمبِهئے رۆچا ۲۰ آزر ۱۴۰۳، یک بلۆچ ٹێلکشێن جهمنندے دُزآپا تامین اجتماییئے نادراهجاهئے نێمگا گۆن ماشینئے دُزگئے دێمگیریا و سلاهبندێن مردمانی تیرگواریان تیرانی آماچ و ٹپّیگ بوتگ.

اے بلۆچ جهمنندئے پجّار (سیید براهویی)، ۲۲ سالگ، مهمد نبیئے چُکّ، سور کُرتگێن و دُزآپئے نندۆک گوَشگ بوتگ.

گێشێن هالانی رِدا، چُنت سلاهبندێن مردم تامین اجتماییئے پارکینگئے نێمگا یک ٹێلکشێن ماشینیئے دُزگئے واستا شُتگ بوتگ‌اَنت که ماشین والائے دێمگیریئے گۆما دێم په دێم بوتگ‌اَنت که تیرانی آماچ بوتگ که گۆن تیرئے لگّگا کلیهئے نێمگا ٹپّیگ بوتگ که سلاهبندێن دُزّان ماشین دُزّت نکُرتگ و چه آ جاها شتگ‌اَنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.