میرجاوها رۆتکئے سیمسرئے بندگا گۆن چُنت هزار مردم چُنت شهرئے تها بێکار بوتگ

رَسانک نیوز

پنچشَمبِهئے رۆچا ۱۵ آزر ۱۴۰۳، میرجاوها گۆن دو هپتگئے گوَزگا رۆتکئے سیمسر بند کنگ بوتگ و اُگدهداران و امنیتی و هکومتی اُگدهداران بێد چه اشیا که مردمانی بێکاریا بچارنت انگت سیمسرِش بستگ که مردم شُت و آتک بکننت یا چیزّے بیارنت و ببرنت.

گێشێن هالانی رِدا، بازێنے چه واش و میرجاوه و شستون و دُزآپئے مردمانی زندگی همے سیمسرئے گۆما اِنت و سیمسرئے بندگ سئوب بوتگ که چُنت هزار مردم بێکار ببنت.

گوَشگ بیت که پێسرترا لهتے چه امنیتی اُگدهداران سیمسرئے پَچ کنگئے کئولی داتگ بله گۆن دو هپتگئے گوزگا انگت رئوگ و آیگئے اجازت نێست.