رَسانک نیوز
سئے شَمبِهئے رۆچا ۱۳ آزر ۱۴۰۳، یک بلۆچێن جنێنے، چه دُزآپئے آمیدگسی وکیلان بُزرگمهرئے هئیابانا سلاهبندێن مردمانی تیرانی آماچ بوتگ که گۆن چار تیرئے لگّگا ٹپّیگ و پد چه امام اَلیئے نادراهجاهئے برگا، وتی ساهی چه دستا داتگ.
اے بلۆچ جهمنندئے پجّار (سمیه هُسئین بر [ملازهی])، کساس ۳۷ سالگ، ولی مهمدئے چُکّ و گُشتئے هلکئے مردم چه شستونئے دمگان و دُزآپئے نندۆک گوشگ بوتگ.
گێشێن هالانی رِدا، کساس شپئے ساهت شش و نێما سلاهبندێن مردم که پرایدیا سئوار بوتگاَنت بُزرگمهرئے هئیابانا اے وکیلێن جنێن که چه وتی ماشینا اێرایگا بوتگ تیرانی آماچ کُرتگ که آیی گۆن چار تیرئے لگّگا مان سرئے نێمگا سَکّ ٹپّیگ و پد چه آییئے امام الیئے نادراهجاه برگا گۆن بازێن ٹپّیگان وتی ساهی چه دستا داتگ.
چه جنۆکانی جنگئے سئوبا و آیانی پَجّارا تنیگت هالے نێست.
گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگاَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هستاِنت.
اولین نفری باشید که دیدگاه مینویسد