یک بلۆچێن کاسبے پد چه سلاهبندێن مردمانی آوار جنگا بێران بوتگ

رَسانک نیوز

یکشَمبِهئے رۆچا ۱۱ آزر ۱۴۰۳، یکّے چه چهبارئے کاسبان که دیابتئے بیماری هم بوتگی پد چه آوار جنَگا و سلاهبندێن مردمانی دستا گروگان بئیگا گۆن سئے رۆچا گوَزگا پد بێران بوتگ.

اے بلۆچ جهمنندئے پجّار (اکبر دانش)، کساس ۵۰ سالگ، چهبارئے نندۆک گوَشگ بوتگ.

گێشێن هالانی رِدا، اکبر پنچشَمبِهئے رۆچا ۸ آزر چهبارئے کُدسئے هئیابانا سلاهبندێن مردمانی دستا آوار جنَگ بوتگ و گروگان گرۆکان آییئے آزاتیئے واستا پول لۆٹتگ بله یکشَمبِهئے رۆچا دُزّان یکے چه آییئے لۆگئے مردمانی نمبر آییئے کیسگا داتگ و پهرها هلوَتێن هئیابانیا وئیلِش کُرتگ.

گروگان گرۆکانی اے کارئے گۆما، اکبرئے لاش یکّے چه شهرداریئے کارندهانی دستا درگێجگ بوتگ و هلکئے مردمان گۆن پئونئے گۆما که آییئے نمبر اکبرئے کیسگا بوتگ آییئے وپاتئے هال آییئے لۆگئے مردمان رسێنتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.