شستونا بلۆچ جهمنندے گۆن سلاهبندێن مردمانی تیرگواریان کُشگ بوتگ

رَسانک نیوز

پنچشهئے بانگواها ۲۴ آبان ۱۴۰۳، گۆن سلاهبندێن مردمانی تیرگواریان مان یک سئواری ماشینیا که یک هلکیئے مردم آییئے تها بوتگ‌اَنت، واش و شستونئے راها کساس گرنچێنئے دمگان، ماشینئے چپّ بئیگ و لۆگئے پتئے ساهی دستا دئیگئے سئوب بوتگ.

کُشگ بوتگێن جهمنندئے پجّار (مهمد رسول موسازهی)، ۴۵ سالگ، مئولابکشئے چُکّ و پهرهئے نندۆک و چه پنی هرپهی کارندهان گوَشگ بوتگ.

گوشگ بیت که سلاهبندێن مردمان که یک ماشینیا سئوار بوتگ‌اَنت و هئیال کنگ بیت دُزّ بوتگ‌اَنت واش و شستونئے راها کساس پسکۆهئے دمگان گرنچێنئے هلکا ماشینئے اۆشتارێنگئے واستا مهمدرسولئے نێمگا راستێن تیرگواری کُرتگ که گۆن چُنت تیرئے لگّگا مان تئیرانی سرا، ماشین چپّ بوتگ.

گۆن ماشینئے چپّ کنگئے گۆما، لۆگئے پتا گۆن بازێن ٹپّان وتی ساه چه دستا داتگ و آ دگه لۆگئے مردم که آییئے جنێن و سئے چُکّ بوتگ‌اَنت کمّکے ٹپّیگ بوتگ‌اَنت.

چه جنۆکانی جتگئے سئوبا و آیانی پجّارا تنیگت هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.