پهرها یک بلۆچ جهمنندے گۆن نزامی نیروانی تیرگواریان ٹپّیگ و آوار جنگ بوتگ

رَسانک نیوز

پنچشَمبِهئے رۆچا ۱۷ آبان ۱۴۰۳، یک بلۆچ جهمنندے گۆن زاتی درێسێن نزامی مردمانی تیرگواریان نۆک آبادئے هلکا پهرهئے شهرا که پرایدێن ماشینیئے راننده بوتگ، ٹپیگ و آوار جتگ و نامالومێن جاهے برگ بوتگ.

اے بلۆچ جهمنندئے پجّار (رهیم شهلی بر)، ۲۵ سالگ، پهرهئے نندۆک و چه تیرگواریانی سئوبا و آییئے جُرما هچ هالے نێست.

گێشێن هالانی رِدا، رهیم گۆن وتی زاتی ماشینا رد بئیگا بوتگ که پهرهئے ادارا اتلاهاتئے زاتی درێسێن نزامیانی تیرگواریان نۆک آبادئے هلکا تیرانی آماچ بوتگ و پد چه اِشیا که ٹپیگ بوتگ آوار جنگ و نامالومێن جاهے برگ بوتگ.

گوشگ بیت که اے جهمنندئے هلکئے مردمان اے گمانا که آیی ٹپّیگ و شهرئے نادراهجاها برگ بیت، اۆدا شتگ‌اَنت بله امنیتی نیروانی آیی هچ نادراهجاهیا نبُرتگ.

گوشگ ببیت که پهرهئے اداره اتلاهاتئے زاتی درێسێن نیروان بێد چا پێسری هُشدار دئیگ و اۆشتارێنگا پرایدێن ماشینئے نێمگا راستێن تیرگواری کُرتگ.