۱۶ مردم چه جئیشُل اَدلئے مردم پاکستان و اێرانی هۆرێن هئوایی اُرشا کُشگ و ٹپّیگ بوتگ‌اَنت

رَسانک نیوز

سئےشمبه شپا ۱۵ آبان ۱۴۰۳، گۆن پاکستان و اێرانئے جمهوری اسلامیئے رژیمئے هۆرێن اُرشا مان بلۆچستانئے هلکانی سرا (پروم، نکُر، سبزکۆه، گَر) که شستونئے سیمسرئے گورا اَنت، دئوازده مردم چه جئیشُل اَدلئے مردمان کُشگ و چار مردم ٹپّیگ بوتگ.

جئیشُل اَدلئے جُنزا جار جتگ که اے هئوایی اُرشا دو مردم چه اُگدهدار و پرماندهێن مردمان هاپز مئولوی (ابراهێم سابکزهی) گۆن (هاپز هسّان) جُنزی پجّار و (پکیر مهمد مهمدزهی)، گۆن (امیر اُمَر)ئے جُنزی پَجّارا هم شهید بوتگ‌اَنت.

انچۆ جئیشُل اَدلئے جُنزا وتی جنگئے دێمرئوی گۆن اێرانئے جمهوری اسلامیئے رژیما جار جاتگ و گوشتگی اگن دراهێن دنیائے کُدرت مئے دێما بۆشتنت پدا هچ بدلی مئے اۆشتا دێما نێست.

اے اُرش بلۆچستانا پد چه اِشیا پێش آتکگ‌اَنت که گوستگێن رۆچا (اَبّاس اراکچی)، اێرانئے جمهوری اسلامیئے ڈنّی وزیرا پاکستانا سپر کُرتگ و گۆن وتی همتائے گۆما اسلام آبادا گندکی کُرتگ.

اے گند نندا اێران و پاکستانئے ڈنّی وزیرا اشیئے سرا اَهد و پئیمان کُرتگ که په سیمسرئے امنیتئے واستا گۆن (ترورییسمئے چالشئے) سرا همکاری بکننت و پاکستانئے ڈنّی وزیرا گوَشتگ‌ تروریسم پاکستان و اێرانئے واستا تهدیدے و دوێن سرڈگار اے تهدیدئے دێمگیرئے واستا گۆن یک و دگر همکاری کننت.