شستونا یک بلۆچ جهمنندے گۆن سلاهبندێن مردمانی تیرگواریان کُشگ بوتگ

رَسانک نیوز

شَمبِهئے رۆچا ۲۸ مهر ۱۴۰۳، یک بلۆچ جهمنندے گۆن سلاهبندێن مردمانی تیرگواریان که دو موتور سئوار بوتگ‌اَنت تیرانی آماچ بوتگ‌ و وتی ساهی چه دستا داتگ.

اے بلۆچ جهمنندئے پجّار (کادربکش گمشادزهی)، مهمدئے چُکّ، سور کُرتگێن و چار چُکّئے پت گُشتئے هلکئے مردم چه شستونئے دمگان گوَشگ بوتگ.

گوشگ بیت که دو مردم که دو موتورا سئوار بوتگ‌اَنت جهادآبادئے هلکا چه شستونئے دمگان کادربکشئے لۆگئے دپا آییئے نێما تیرگواری کُرتگ و آیی گۆن چُنت تیرئے لگّگا وتی ساهی چه دستا داتگ.

چه جنۆکانی جنَگئے سئوبا و آیانی پَجّارا تنیگت هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.