واش و دُزآپئے راها گۆن جادهی وئیلئے گۆما سئے جهمنند بێران و ٹپّیگ بوتگ که یکّے چا آیان ٹێلکشے بوتگ

رَسانک نیوز

شَمبِهئے رۆچا ۲۸ مهر ۱۴۰۳، کتار هنجکئے هلکا دُزآپئے دمگان یک پژو ۴۰۵ ێن ٹێلکش و یک وانتیا ڈیکّر وارتگ، پژوئے رانندها وتی ساه چه دستا داتگ و دوێن نئیسان والا ٹپّیگ بوتگ‌اَنت.

بێران بوتگێن جهمنندئے پجّار (اسماێل براهویی)، ۲۷ سالگ، اهمدئے چُکّ، سور کُرتگێن و سئے چُکّئے پت و منزل آپئے هلکئے مردم چه دُزآپئے دمگان گوَشگ بوتگ.

اے وئیل کساس ساهت دئوازده و نێما، دُزآپئے ۱۵ کیلومتریا گۆن دو ماشینئے ڈیکّر ورگا پێش آتکگ که پژوێن ماشینئے رانندها وتی ساه چه دستا داتگ و نئیسانئے راننده چه پادئے نێمگا ٹپّیگ و آییئے شاگرد هم کمّکے ٹپّیگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.