رَسانک نیوز
سئے شَمبِهئے شپا ۱۷ مهر ۱۴۰۳، یک بلۆچ جهمنندے سلاهبندێن مردمانی دستا کساس دُزآپئے پلیس راهئے نزّیکا تیرانی آماچ بوتگ و گۆن چُنت تیرئے لگّگا وتی ساهی چه دستا داتگ.
اے بلۆچ جهنندئے پجّار (یونس دهمرده)، ۱۸ سالگ، سرورئے چُکّ و دُزآپئے نندۆک گوَشگ بوتگ.
گێشێن هالانی رِدا، کساس شپئے ساهت نُها، پژو ۴۰۵ێن سلاهبندێن مردمان دُزآپئے پلیس راها و دُزآپ و نسرت آبادئے راها یونسئے ماشینی تیرانی آماچ کُرتگ گۆن چُنت تیرئے لگّگا مان پادا ٹپّیگ بوتگ و تامین اجتماهیئے نادراهجاها برگ و دئوا کنگ بوتگ.
چه جنۆکانی جنَگئے سئوبا و آیانی پَجّارا تان انّون اچ هالے نێست.
گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.
Be the first to comment