سربازا دو ٹێلکشێن بلۆچ چه جادهی وئیلا ٹپّیگ بوتگ‌اَنت

رَسانک نیوز

سئے شمبهئے رۆچا ۱۷ مهر ۱۴۰۳، گۆن دو دزگاه ٹێلکشێن ماشین سایپا و لندکروزئے ٹپّیگ بئیگا سرباز و راسکئے راها، دو ٹێلکش بلۆچ جهمنند ماشینئے تها بوتگ‌اَنت و ٹپّیگ بوتگ‌اَنت.

چه اے جهمنندێن مردمانی پَجّارا تان انون هچ هبرے نێست.

گێشێن هالانی رِدا، سایپاێن ماشینا جادهئے لیز بئیگئے سئوبا وتی کنترل چه دستا داتگ و سئوب بوتگ که لندکروز که آییئے دێما آتکگ ڈیکّر بوارت.

ٹێلکشی چه هما کاران هساب بیت که بازێنے چه بلۆچێن جهمنندان چه بلۆچستانئے جاه جاهان، مناسبێن و مُدامێن کارئے نێستیا، ٹێلکشیئے نێمگا شُتگ‌اَنت که برے گۆن لهتێن وئیلان چۆ گاڑیئے چپّ کنگ و امنیتی و نزامی نیروانی تیرشانیا دێم په دێم بنت و آیانی جانا تهدید کنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.