سرباز کم چه کم چار مردم گۆن دو ماشینئے تسادپا کُشگ و ٹپّیگ بوتگ که یکّے چه آیان ٹێلکشے بوتگ

رَسانک نیوز

یکشَمبِهئے رۆچا ۱۵ مهر ۱۴۰۳، گۆن دو ماشینئے تسادپا که یکّے ٹێلکشێن تیباے بوتگ و دگه یکّے رهگوَزێن پرایدے بوتگ کساس سرکئورئے دمگان چه سربازئے شهرا، سئے مردم چه پرایدئے مردمان گۆن بازێن ٹَپّان وتی ساهش چه دستا داتگ و تیبائے راننده ٹپّیگ بوتگ.

چه سئیێن بێران بوتگێن جهمنندان که پرایدئے نندۆک و کیشکئورئے هلکئے مردم چه سربازئے دمگان و ٹپّیگ بوتگێن رانندهئے پجّار که باتکئے مردم بوتگ هچ هالے نێست.

اے وئیل کساس ملک آبادئے هلکا سرکئورئے دمگان چه سربازئے شهرا پێش آتکگ و سئوب بوتگ که سئے کس چه پرایدئے مردمان وتی ساه چه دستا داتگ و ٹێلکشێن ماشینئے راننده ٹپّیگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.