میرجاوهئے شهرا روتکئے سیمسرا دو بلۆچ ٹێلکش گۆن نزامی نیروانی تیرگواریان کُشگ و ٹپیگ بوتگ‌اَنت

رَسانک نیوز

شَمبِهئے سُهبا ۱۴ مهر ۱۴۰۳، نزامی نیروانی تیرگواریان یک ٹێلکشێن ماشینیئے نێمگا روتکئے سیمسرا میرجاوئیا که سئوب بوتگ دو بلۆچ جهمنند که ماشینئے نندۆک بوتگ‌اَنت کُشگ و ٹپّیگ بوتگ‌اَنت.

کُشگ بوتگێن جهمنندئے پجّار (امین گنگوزهی)، کساس ۴۰ سالگ، کرمئے چُکّ و گزوئے هلکئے مردم پشتکوئے دمگان چه واشئے شهرا و ٹپّیگ بوتگێن بلۆچئے پجّار (گلام هُسئین رهمت زهی) مهمداَلیئے چُکّ گوَشگ بوتگ.

گێشێن هالانی رِدا، نزامی نیروان بێد چه پێسری هُشدار و اۆشتارێنگا اے جهمنندانی نێمگا تیرگواری کُرتگ اشیئے سئوبا امینا تیر وارتگ و وتی ساهی چه دستا داتگ و گلام هسئین چه دستئے نێمگا ٹپّیگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.