مگسا دو بلۆچ جهمنند گۆن سلاهبندێن مردمانی تیرگواریان کُشگ و ٹپّیگ بوتگ‌اَنت

رَسانک نیوز

جُمَهئے بانگواها ۱۳ مهر ۱۴۰۳، مگسئے درآیگئے راها که سب و سۆرانئے شهرا رئوت سلاهبندێن مردمان یک موتوریئے نێمگا تیرگواری کرتگ که یکّے چه موتور سئواران وتی ساه چه دستا داتگ و دگه یک مردمے سکّ ٹپّیگ بوتگ.

کُشگ بوتگێن جهمنندئے پجّار (مجید بارانزهی)، ۲۳ سالگ، شێرمهمدئے چُکّ و ٹپّیگ بوتگێنئے پجّار (مهمد هُسئین‌بر)، کساس ۲۱ سالگ، شریپئے چُکّ، هر دوێن پسکۆهئے مردم چه سب و سۆرانئے دمگان گوَشگ بوتگ.

سلاهبندێن مردمانی تیرگواری کساس بانگواهئے ساهت سئیا [۳]، سب و سۆرانئے راها پێسر چه پلیس راها پێش آتکگ که مجید گۆن تیرئے لگّگا وتی ساهی چه دستا داتگ و مهمد هم ٹپّیگ بوتگ و هاتمل انبیائے نادراهجاها پهرهئے شهرا برگ بوتگ.

چه جنۆکانی جنگئے سئوبا و آیانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.