رَسانک نیوز

سئے شمبهئے رۆچا ۱۰ مهر ۱۴۰۳، یک بلۆچ جهمنندیئے لاش پد چه دو رۆچا که گار و بێگواه بوتگ، کسانێن نیلێن زرئے کرا نزیک رمینئے هلکا و چهبارئے شهرا ودی کنگ بوتگ که تیرئے ورگئے سئوبا وتی ساهی چه دستا داتگ بوتگ.

اے بلۆچ جهمنندئے پجّار (نئوید آبادیان)، ۲۸ سالگ، ناسرئے چُکّ، سربازئے مردم و کُمبئے نندۆک چه چهبارئے دمگان گوَشگ بوتگ.

گێشێن هالانی رِدا، یکشَمبِهئے رۆچا ۸ مهر پد چه کارئے هلاس بئیگا چه لۆگا در بوتگ و پد چه آییا هچ هالے چه آییا نبوتگ و موبایلی هم هامۆش بوتگ. آییئے لۆگئے مردمانی و کلانتری پَٹّ و پاس بێسۆب بوتگ تان اِشی که سئے شمبهئے رۆچا چه چهبارئے سارتێن لۆگا (سردخانه) په آییئے لۆگئے مردمان گوانک کُرتگ و آییئے ساه دئیگئے هالِش داتگ.

چه جنۆکانی جنَگئے سئوبا و آیانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.