رَسانک نیوز

چارشمبهئے بانگواها ۴ مهر ۱۴۰۳، یک جهمنند بلۆچے که چه هلکئے اسپێت ریشان اِنت، دُزآپا سهدیئے هئیابانا گۆن سلاهبندێن مردمانی تیرگواریان تیرانی آماچ بوتگ و گۆن چُنت تیرئے لگّگا ٹپّیگ بوتگ.

اے بلۆچ جهمنندئے پجّار (پاروک کاشانی)، چه کاشانیئے کُٹمئے اسپێت ریشان و دُزآپئے نندۆک گوَشگ بوتگ و بلۆچانی همگرنچی و یکجاهیئے واستا باز کاری کُرتگ.

گێشێن هالانی رِدا، کساس ساهت دها، دُزآپا سهدی هئیابانا سلاهبندێن مردمان گۆن راستێن تیرگواریان پاروکئے نێمگا، آییش تیرانی آماچ کُرتگ که گۆن سئے تیرئے لگّگا مان پاد و لاپا ٹپّیگ و دُزآپئے هاتمُل انبیائے نادراهجاها برگ بوتگ.

چه جنۆکانی و آیانی جنَگئے پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.