رَسانک نیوز

شمبه رۆچا ۳۱ شهریور ۱۴۰۳، پهره و بزمانئے راها مرسادئے نیروان یک ٹانکیئر نێمگا گئیر کانونی سرا تیرگواری کُرتگ و سئوب بوتگ چپّ ببیت و ماشین آس بگیپت و یک ٹێلکشے آسئے تها وتی ساها چه دستا بدنت.

اے بلۆچ ٹێلکشئے پجّار (روهلّاه اگتدار نژاد)، ۴۰ سالگ، سور کُرتگێن و دو چُکّئے پت و جیرپتئے مردم و همیدُلّاهئے نندۆک چه دلگانئے دمگان گوَشگ بوتگ.

گوَشگ بیت مرسادئے نزامی نیروان بزمان و پهرهئے راها کمین کُرتگ و اے ٹێلکش ٹانک والائے نێمگا راستێن تیرگواری کُرتگ که سئوب بوتگ ماشین چپّ بوتگ و آس گپتگ و راننده آسئے تها وتی ساهی چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.