رَسانک نیوز

سئے شَمبِهئے رۆچا ۲۶ شهریور ۱۴۰۳، یک ۱۷ سالگێن بلۆچ جنێن چُکّے چه وتی لۆگئے مردمانی زۆرێن سورئے دئیگئے سئوبا وتا سۆتگ که سۆچگئے سئوبا سکّ ٹپّیگ و ناددراهجاها برگ بوتگ و هالی سکّ هراب اِنت.

اے جنێن چُکّئے پجّار (س ـ گ)، ۱۷ سالگ و پهرهئے نندۆک گوشگ بوتگ.

گێشێن هالانی رِدا، اے ۱۷ سالگێن جنێن چُکّ یک سالے پێش چه وتی لۆگئے مردمانی نێمگا گۆن دگه بچکیا که هچ دۆستیے گۆن آییا نبوتگی سانگ کنک بوتگ و کساس دو هپتگ پێش وتی لۆگئے مردمانی زۆراکیا سور کنگ بوتگ‌اَنت که انّوگان وتی پت و ماتئے لۆگا شُتگ و ناراهتیئے سئوبا هماما شُتگ و ٹێلئے گۆما وتا سۆتکگی و بازێن ٹپّانی سئوبا یک بد هال و نادراهجاها برگ بوتگ.

گوشگی اِنت اے جنێن چُکّا پێسرا هم وتی لۆگئے مردم هُشدار داتگ‌اَنت اگن شما منا گۆن کسے که دۆستُن نبیت سانگ بدئیێت وتا سۆچان بله آییئے لۆگئے مردمان هبر گۆش نداتگ و هئیالِش کُرتگ اگن سور بکننت گُڑا دۆستیی کئیت.