رَسانک نیوز

سئے شَمبِهئے رۆچا ۲۷ شهریور ۱۴۰۳، پژو ۴۰۵ێن ماشینیئے چپّ کنگ و آس گرگا، کساس (ده رزا)ئے هلکا انبرآبادئے شهرا، سئے بلۆچ ٹێلکش که دو مردم چه آیان نۆک ورنا بوتگ‌اَنت آسئے تها وتی ساهِش چه دستا داتگ‌اَنت.

اے سئیێن مردمانی پجّار (رسول کنبری)، ۱۵ سالگ، (ایسا کنبری)، ۲۳ سالگ، هر دوێن بجارئے چُکّ، چهل کنارئے مردم چه دلگانئے دمگان و (اُمید رزا کنبری) کساس ۱۷ سالگ، میرزائے چُکّ و انبرآبادئے نندۆک گوَشگ بوتگ‌اَنت.

گێشێن هالانی رِدا، کساس ساهت دو و نێما اے سئیێن ٹێلکش بلۆچانی ماشین کساس ده رزائے هلکا انبرآبادا چپّ و آس گپتگ و هر سئیێن مردم آسئے تها وتی ساهِش چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.