رَسانک نیوز

چارشمبهئے رۆچا ۲۱‏ شهریور ۱۴۰۳، بلۆچ ٹێلکشے کشتگانئے هلکا بم پشتئے مُلکا شستونئے دمگان ابێد چه آییئے اۆشتارێنگ و هُشدار دئیگا مرسادئے نزامی نیروانی دستا تیرانی آماچ بوتگ و گۆن تیرئے گۆما ٹپّیگ بوتگ.

اے ٹێلکشێن بلۆچئے پجّار (مهران بلۆچزهی)، ۲۹ سالگ،‏ ابراهێمئے چُکّ، سور کُرتگێن و گرانئے هلکئے مردم بمپشتئل هلکا و شستونئے دمگانی مردم گوشگ بوتگ.

گێشێن هالانی رِدا، کساس بێگاهئے ساهت پنجا، مرسادئے نزامی نیرو بێد چه اۆشتارێنگ و پێسری هشدار دئیگا مهرانئے رئوکێن ماشینئے سرا راستێن تیرگواری کُرتگ که آیی گۆن پادئے تیرئے ورگا ٹپّیگ بوتگ و مردمانی دستا نادراهجاها برگ بوتگ.

مهرانئے ماشین چۆ نزامی نیروانی تیرانی آماچ بوت که هالیگ بوتگ و آییئے گۆما ٹێل نبوتگ و مرسادئے نزامی نیروان پد چه اِشیا که آیی تیرانی آماچ کُرتگ و زانتگِش که آییا تیر وارتگ و بید چه نادراهجاهے برگ جاهِش وئیل کُرتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.